Ришат Фазлыйәхмәтовның тормышы җайлана: хатынын өенә кертми, машина бүләк иткәннәр

6 Июля 2018

Автор: Юлия НАСЫЙБУЛЛИНА
Фото: Ришат Фазлыйәхмәтов
Ришат Фазлыйәхмәтовның тормышы әкренләп җайлана башлады, аның йөзендә елмаю күренә. Ул "Интертат"ка хатыныннан аерылуы һәм хәзер йөрәгенең буш булуы турында сөйләде. Ләкин елмаюның сәбәбе башкада. Күптән түгел бер таныш абзые (Ришат үзе хөрмәт иткән кешеләренә шулай эндәшә) аңа машина бүләк иткән. "Минем иҗатымны хөрмәт итүче таныш абзый сабан туенда машина бүләк итте. Ышанырлык та булмады, шаяра дип уйладым башта", - дип шатлыгы белән уртаклашты җырчы.

- Ришат, Казанны ташлап, яшәргә авылга кайтып киткән дип ишеттек үзеңне, дөресме?

- Эшем Казанда, торуым авылда хәзер. Әни үлгәч, туган нигезне буш калдырасым килмәде. Быел җәй көне авылга кайтып өебезгә һәм мунчага заманча итеп ремонт ясадым, бакчаларны рәткә китереп бәрәңге утырттым. Җәен эшлисе эшләр күп әле. Кышка таба авылда үземә генә күңелсез булачак билгеле, бәрәңгеләр алгач, шәһәргә килермен дип уйлап торам.

- Туган йортыңның һәр почмагы әниеңне хәтерләтә торгандыр. Ул исән чакта шушылай авылда торган булсам икән дигән уйлар керәме башыңа?

- Хәтерләтә, әлбәттә. Авылга кайтып, йортны каравыма әни дә сөенеп ятадыр сыман. Ул исән чакта да авылга яратып кайта идем. Җырчы булып китүемдә әниемнең өлеше бик зур. Ул минем укып чыгып, чын җырчы булуымны теләде, шул ният белән вакытында Казанга чыгарып җибәрде. Бүгенгем өчен аңа рәхмәт әйтеп дога кылам.


- Авылдагы йортта берүзең генә торасыңмы?

- Әйе, үзем генә, төпчек бала бит мин.

- Тормыш иптәшең кайтмыймы? 

- Юк, гаиләне кертү юк хәзер. Бергә түгел бит. Бернишләп тә булмый, тормыш дәвам итә...

- Ришат, син рәсми рәвештә аерылганмы инде хәзер?

- Аерылган. Без никах белән тордык, язылышмаган да идек.

- Димәк, йөрәгең буш?

- Буш!

(Ришат Фазлыйәхмәтов "Интертат"ка аерылышуының сәбәбен сөйләгән иде).

- Әкрен генә тормышың җайлана башлады сыман. Яңа машина да алып җибәргәнсең икән...

- Аллага шөкер. Юк, юк, машинаны үзем алмадым, бүләк иттеләр. Минем иҗатымны хөрмәт итүче таныш абзый Буа районының бер авылына сабан туена чакырды быел. Шул сабан туйда ул миңа Лада Гранта машинасы бүләк итте. Менә шул машинага утырып Казаннан авылга кайтып барышым. Тәрәзәләрне тонировкаладым һәм башка кирәк-яракларын алып куйдым әле, җырчы кеше булгач, яңа машинаны матурлыйсы килә бит.

- Моңа кадәр машинаң юк иде мәллә?

- Юк, кая инде, миңа тагын(көлә).


- Абзый дигәнең кем була соң, сер булмаса әйт әле?

- Сер түгел, Фәйзрахманов Илнар Искәндәр улы. Бик олы йөрәкле, кеше. Җырларымны бик ярата, үземне дә якын итә. Тумышы белән Буа районыныкы ул.

- Шундый кәттә бүләк алган мизгелдә нинди хисләр кичердең?

- Көтелмәгән бүләк булды бу. Сабан туйда батыр калган көрәшчеләргә генә машина бирәләр, дип уйлый идем. Әле моңарчы сабан туйда җырчы кешегә машина биргәннәрен күргәнем юк иде. Ышанырлык та булмады, шаяра дип уйладым башта. Машинаны күргәч кенә ышандым, бик сөендем, әлбәттә. Беренче тапкыр шундый зур бүләк алдым, яшермим. Мактанып әйтүем түгел, кемгәдер айфон бүләк итәләр, кемгәдер машина. Иҗатымны югары бәяләгән кешеләргә һәм тугъры тамашачыма рәхмәтем чиксез!

Фикерләр








Шоу-бизнес

Рифат Фәттахов Гөлсиринне магистратурада укытырга теләми: "Укуны Венера Ганиевада дәвам иттерүнең мәгьнәсен күрмим!"

Күптән түгел генә Гөлсирин Абдуллинаның югары уку йортын тәмамлап, зәңгәр диплом алуы хакында язган идек. Җырчының зәңгәр төстәге дипломы укучыларыбыз арасында шау-шу уятты. Гөлсириннең продюсеры да ризасызлык белдерде. "Шаккатмалы хәл, инде Гөлсирингә дә кызыл диплом бирмәгәч... Башкалар үпкәләмәсен, әмма Венера Ганиеваның быелгы чыгарылышы арасында профессиональ сәхнәдә иң зур уңышка ирешкәне Гөлсирин Абдуллина!" - диде Рифат әфәнде Фәттахов Интертатка.

Шоу-бизнес

Артистлар халыкны акча санауда гаепли: “Ни өчен без бушка эшләргә тиеш?”

Кайсы гына җырчының социаль челтәрдә аккаунтын ачып карама, анда артистның чит илдә ял итүен, матур йортта яшәвен, яхшы машинада йөрүен, затлы күлмәкләр киюен тасвирлаган фотоларга юлыгасың. Кайбер очракларда  җырчыларның бу фотосүрәтләре очын-очка ялгап яшәүчеләрнең ачуын чыгара - бу фотолар астында калдырылган комментарийларда ачык күренә. Күпләр артистларны байлык артыннан чабучылар дип гаепли. Татар эстрадасы артистлары мондый тискәре мөнәсәбәт турында нәрсә уйлый? “Интертат” хәбәрчесе шуны белеште.

Шоу-бизнес

Татар тамадалары туйны күпмегә алып бара: бәяләр рейтингы

Туйның үзәгендә кияү белән кәләш булса, мәҗлестә кунакларның күңелен күрүче, аларга яхшы кәеф бүләк итүче - алып баручы тора. Җәй ае ул – никах, туйлар ае. Шулай булгач, татар эстрадасы йолдызлары өчен “кызу урак өсте” башлана. Аларның күпләре бу чорда акча эшләп калырга омтыла. “Интертат” хәбәрчесе яшьләргә ярдәм йөзеннән җырчы - тамадаларының үз рейтингын туплады. Бәяләр тамадаларның үз әйткәннәреннән чыгып күрсәтелде.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Персонал данные

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла