Интертат проектлары

Хөрмәтле дуслар! Әлеге сәхифәдә сез «Intertat.ru» газетының төрле иҗади проектлары турында белә аласыз.

* * *

Татарстан Хөкүмәте карары белән 2009 елдан “Intertat.ru” редакциясе Интернетта бөек татар шагыйре Габдулла Тукайның тормыш һәм иҗат юлына багышланган рәсми портал ясау белән шөгыльләнә. 2009 елның 26 апрелендә - Габдулла Тукайның туган көнендә, портал Интернетта www.gabdullatukay.ru адресы буенча эшли башлады. Әлеге сайтта татар шагыйренең иҗади мирасы гына түгел, галимнәребез Тукайны өйрәнеп язган күп санлы фәнни эшләр, язучыларыбызның матур әдәбият әсәрләре, шулай ук Тукай музейлары, Тукай исемендәге ТР Дәүләт премиясе лауреатлары турында да тулы мәгълүмат бирү, бай фотогалерея, аудио- һәм видеоархивлар ачу максат итеп куелган.

* * *

Татарстан Республикасының «Татар гаиләсе фонды» белән берлектә «Intertat.ru» редакциясе Интернетта «Татар гаиләсе» сайтын оештырды. tatargailese.ru адресы буенча урнашкан әлеге сайтта татар гаиләсен борчыган мәсьәләләр буенча фикер алышырга мөмкин. Сайтта татар гаиләсенең бүгенгесен һәм киләчәген кайгыртып язылган мәкаләләр, үрнәк парлар белән әңгәмәләр урын алып бара.


* * *

Татарстанның «Татар гаиләсе» фонды республикадан читтә яшәүче татарларның яшәеш-көнкүрешен белергә теләп, сәфәргә чыкты. Беренче тукталыш – Россия күршесендәге ил - Финляндия. Чит дәүләттә, ят мохиттә ана телен һәм милләтне бары тик гаилә генә саклап кала ала. Бу сүзләрнең дөреслеген Финляндиянең татар диаспорасы мисалында дәлилләргә була. Финляндиядә яшәүче милләттәшләребез турында «Intertat.ru» газетында «Финляндиягә сәяхәт» сәхифәсеннән укырга киңәш итәбез. Газетның баш мөхәррире Әлфия Миңнуллина «Татар гаиләсе» фонды вәкилләре белән Финляндиянең татар гаиләләре белән танышып, аралашып, аларның уй-фикерләрен, борчуларын тыңлап кайтты.

***

2011 елның 26 апрелендә бөек татар шагыйре Габдулла Тукайның тууына 125 ел тула.  Әлеге вакыйгага Татарстан Республикасы мәдәният дөньясы вәкилләре зурлап әзерләнә. Чыннан да, хәл итәсе мәсьәләләр шактый. Әйтик, Казанның бизәге булып торган Габдулла Тукай әдәби музеена төпле ремонт, экпозицияләрне баету таләп ителә. Шагыйрьнең туган көне уңаеннан быел «Intertat.ru» редакциясе хәбәрчеләре музейга сәяхәт кылган иде. «Габдулла Тукай йорты»нда алган тәэсирләр турында «Тукайны искә алып» сәхифәсендә танышырга мөмкин.

* * *

Күптән түгел танылган язучы, тарихчы Фәүзия Бәйрәмова Себер якларында йөреп кайтты. Анда күргәннәре, сәфәрдә алган тәэсирләре белән ул «Intertat.ru» укучылары белән дә уртаклаша. Газеттагы «Себер иленә сәяхәт» сәхифәсендә язучының язмалары белән танышып була.