Корбан бәйрәме-2017: 20 мәйданчык, 2 меңнән артык бәрән, мохтаҗларга 10 тоннадан артык ит

4 Сентября 2017

Укылган: 273 тапкыр

Фото: Рамил Гали, Михаил Захаров
Быелгы Корбан бәйрәмен Татарстан мөселманнары Диния назәрәте аеруча киң колачлы итеп уздырды. Ислам динендә иң зур бәйрәмнәрнең берсе булган Корбан гаете яхшы әзерлек белән, югары дәрәҗәдә оештырылды, шуңа да мөселманнар гына түгел, республиканда яшәүчеләрнең барчасы да, милләтенә-диненә карамастан, аны шатлык һәм күтәренке кәеф белән бәйрәм итте. 
Студентлар һәм карт-карчыклар, инвалидлар һәм йортсызлар, ятимнәр һәм ялгыз аналар, күп балалы һәм мохтаҗлыкта булган гаиләләр – барысы да Корбан бәйрәмен түземсезлек белән көтте. Нинди диндә булуына һәм милләтенә карамастан, алар бу көннәрдә мөселманнар кулыннан корбан итен бүләк итеп алды.



  Казанда һәм районнарда корбан чалу өчен махсус урыннар булдырылды, аларны ТР Роспотребнадзор оешмасы, ТР Баш ветеринария идарәсе, ТР Эчке эшләр министрлыгы һәм башка тиешле органнар таләпләренә туры китереп җиһазладылар. Казанда гына да корбан чала торган 20 махсус мәйданчык эшләде. Бәрәннәрнең барысы да санитар тикшерү һәм ветеринар эшкәртү аша узды. Корбан чала торган көннәр дәвамында малның тиресен, башларын, яшарга яраксыз калдыкларын җыеп, эшкәртү белән шөгыльләнүче оешмалар хезмәт күрсәтте.

  Корбан бәйрәменең бөек максаты – мохтаҗларга, фәкыйрьләргә ярдәм күрсәтү, аларны ит белән сыйлап, сөендерү. Татарстан мөселманнарының Диния назәрәте ел саен бу эшне зурлап башкара. Быел да корбан ите авыр хәлдә калган гаиләләргә һәм социаль оешмаларга тапшырылды. Барлыгы 2250 корбан бәрәне һәм 50 сыер мохтаҗларга өләшенде. Корбанга тиешле мал Диния назәрәтенең “Зәкят” һәм “Ярдәм” хәйрия фондларына, Татарстанның Сукырлар җәмгыятенә, Татарстанның 11 мәдрәсәсенә, Арча, Балтач, Азнакай һәм Яр Чаллы мөхтәсибәтләренә тапшырылды, алар итне мохтаҗларга өләште. Шулай ук бәйрәмне оештырган һәм мал суюда эшләгән ихтыярыйларга да корбан ите бирелде.



    Корбан итенең иң күп өлешен “Зәкят” Хәйрия фонды таратты – 10 тоннадан артык ит мохтаҗларга барып иреште. Гаетнең өч көне эчендә 700 дән артык мохтаҗ кеше кулына 8 әр килограмм ит тапшырылды. “Зәкят” фонды кайгыртып торучы мохтаҗларның берсе, Татарстан мөфтиятеннән ярдәм алган Татьяна Рябцева сүзләренә караганда, Корбан бәйрәме төрле милләттән һәм төрле диндә булган кешеләрне берләштерә, бер-берсенә якынайта, миһербанлы һәм шәфкатьле булырга өнди. Бу яшь ханым авыр формалы ДЦП белән чирләүче кызны тәрбиягә алган, ул аны берүзе карый. Сигез яшьлек бала хәрәкәтләнә дә алмый, моның өстенә, күзләре дә күрми.

“Мин мөселман түгелмен, ләкин фондның чакыруын зур сөенеч блән кабул иттем һәм монда мөселман бәйрәменә килдем. Мөмкинлектән файдаланып, барлык мөселманнарны Корбан бәйрәме белән котларга телим. Монда кешене дин буенча аерып тормыйлар – һәркемгә ярдәм итәләр”, - дип, тәэсирләре белән уртаклашты Татьяна.

 Татарстан Диния назәрәте исеменнән шулай ук ТР Инвалидлар җәмгыяте, ТР Бөек Ватан сугышы ветераннары җәмгыяте, “ТР күп балалы гаиләләре” Иҗтимагый оешмасы әгъзаларына да азык-төлек белән ярдәм күрсәтелде. Оешмалардан – “Әти-әнисе тәрбиясеннән мәхрүм калган балаларны гаиләгә урнаштыруга ярдәм итү, бала алган гаиләләрне әзерләү һәм аларга ярдәм күрсәтү” дәүләт бюджет оешмасына, “Восхождение” инвалидларны тернәкләндерү үзәге”, “Гаврош” балалар һәм яшүсмерләр социаль приюты, Республика балалар психоневрологик санаторие, Казанның әти-әнисе тәрбиясеннән мәхрүм калган һәм ятим балалар өчен 11 нче номерлы интернат-мәктәбе, Казанның сәламәтлек мөмкинлекләре чикләнгән балалар өчен 1 нче номерлы интернат-мәктәбенә ярдәм оештырылды. Корбан ите шулай ук А.Вавилова исемендәге Хәйрия фонды, “Альпари” һәм “Казан әниләре” хәйрия фондларына да тапшырылды.



    Корбан гаете алдынан “Зәкят” фонды авыр чирләр белән интегүче балалар өчен акча җыю акциясе дә уздырды. Җыелган акчага ДЦП ның авыр формасы белән чирләүче 10 яшьлек Павлик Воробьев һәм Тимур Фазлыевка дәвалау курслары узарга мөмкинлек булачак.



   “Аллаһ Тәгалә малы булган кешеләргә ярлылар һәм мохтаҗларны кайгыртырга, аларны ашатырга, бөтен кешеләр белән яхшы мөгаләмәдә булырга куша, - дип билгеләп үтте Татарстан мөфтие Камил Сәмигуллин республикада узган Корбан бәйрәменә нәтиҗә ясаганда. – Коръән Шәрифтә әйтелгән – “Аллаһуның үзенә генә ихлас гыйбадәт кылыгыз, аңа һичкемне, һичнәрсәне тиңдәш кылмагыз, ата-анага изгелек итегез һәм якын кардәшләргә, ятимнәргә, мескеннәргә, кардәш булган күршеләргә һәм кардәш булмаган күршеләргә дә изгелек итегез. Шулай ук сәфәрдә ят юлдашларга, үзегезгә кунак булып килгән юлчыларга һәм хезмәтче колларыгызга изгелек итегез. Тәкәбберләнеп мактанучыны Аллаһ, әлбәттә, сөйми!” (“Ән-Ниса” сүрәсе, 36 нчы аят). Ә Мөхәммәд Пәйгамбәр (салләллаһү галәйһи вә сәлләм) әйтте: “Күршесе ач булып, үзе тук булучы мөэмин түгелдер”, - диде. Шуңа да, әгәр кешенең ниндидер мөмкинлекләре бар икән, аларны изге эшләр башкаруга тотарга кирәк, һич тә бары тик үзеңне тагын да баету өчен генә түгел. Бу көннәрдә үз малыннан өлеш чыгарып, корбан чалып, мохтаҗларны куандырган һәркемне Аллаһ Тәгалә ике дөнья игелекләре белән бүләкләсен. Эшләре тагын да уңышлы, тормышлары җитеш һәм бөтен булсын!”


Фикерләр








Дин

Ислам дөньясы Яңа елны каршылый: Изге мөхәррәм ае хикмәтләре

Мөхәррәм аеның беренче көне җитү белән һиҗри исәп буенча 1439 ел башлана. 21 сентябрь изге мөхәррәм аеның беренче көне. Яңа ел башы, бу олуг айны олыларга теләгән мөселман кардәшләребезгә аның хикмәтләрен, фазыйләтләрен искә төшерү урынлы булыр.

Дин

Хаҗ сәфәреннән кайтучылар: Татар теле халыкара тел булып хезмәт итә ала икән

Изге сәфәрдән кайтучыларның 46 кешелек беренче төркемен мөфти Камил хәзрәт Сәмигуллин үзе каршы алды. Аларның хис-кичерешләрен, хәлләрен һәм изге җирдән нинди теләкләр белән кайтуларын "Татар-информ" хәбәрчесе белеште.

БАШКА ЯҢАЛЫКЛАР

Intertat.ru © 2001 - 2017 Әлеге ресурста 12+, 16+, 18+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@intertat.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла