Төмәндә «Себер йолдызы»н сайладылар

25 апрель көнне Төмәндә «Себер йолдызы» өлкә бәйгесенең финал өлеше узды. Шәһәрнең «Железнодорожник» мәдәният йортында 19 татар кызы Төмән өлкәсенең иң гүзәл татар кызы исеме өчен көрәште.

Хәер, аларга финалга чыгу өчен генә дә шактый көч сарыф итәргә туры килде. Чөнки бәйгенең февральдә үткән беренче сайлап алу өлешенә өлкәнең төрле төбәкләреннән 60тан артык кыз җыелган иде. Алар татарча белүләрен, үзләренең осталыкларын күрсәттеләр. Кызлар татарча җырлады, биеде, шигырьләр сөйләде. Март аенда исә «Себер йолдызы» бәйгесенең финал өлешенә сайлап алулар узды. Монда инде шартлар да кырысрак, бәйгеләр дә катлаулырак булды. Мәсәлән, конкурсантларга заманча татар кызы образын тудырырга кирәк иде. Нәтиҗәдә, Төмән, Тобольски шәһәрләре, Ялутор, Түбән Тавда, Төмән районнарыннан 21 татар кызы финалга чыкты. Алар ике ай дәвамында бәйгегә әзерләнде, бию, сәхнә осталыгы, матур, дөрес итү киенү буенча мастер-классларга йөрде.

Башка гүзәллек бәйгеләрендә кебек үк, «Себер йолдызы»нда да кызлар үз-үзләрен сәхнәдә матур итеп тота белергә, милли киемдә һәм затлы күлмәктә чыгыш ясарга, иҗади бәйгедә катнашырга, бии белергә тиеш. Ләкин калганнардан аермалы буларак, монда, татар кызларының тыйнаклыгын истә тотып, сәхнәдә купальникларда йөрү юк. Хәер, әлеге бәйгесез дә кызларга шактый осталык күрсәтергә туры килә. Беренче булып конкурсантлар бергәләшеп татарча бию башкара. Аннары алар үзләрен тәкъдим итә. Моның өчен кызларга оештыручылар видеоролик төшереп килергә дә куша. 25 секундлык кына шушы фильмда, барлык катнашучылар да үзләре белән бик кызыклы һәм эчтәлекле итеп таныштыра алды, дип сөйләде «Себер йолдызы» проекты җитәкчесе Алсу Тушакова. Бәйгенең өченче өлешендә кызлар үзләренең иҗади осталыклары белән таныштырган. Монда татарча җырлау, бию, шигырьләр сөйләү белән беррәттән, киемнәр коллекциясен күрсәтү, хәтта чәчәкләрдән ясалган Татарстан гербын тәкъдим итү дә булган.

Шуңа да, Төмән өлкәсе татарлары конгрессы Башкарма комитеты  җитәкчесе Ринат Насыров җитәкчелегендәге жюри әгъзаларына шактый кыенга туры килгәндер. Озак кына киңәшләшкәннән соң алар «Себер йолдызы» исеменә Наилә Богапова лаек дигән карар чыгарды. Икенче урынны исә Иләнә Садыкова яулады. «Татар кызы» исемен бәйгедә Флера Шәйхетдинова алды. Тамашачылар бүләгенә Эльмира Садыкова лаек булды. Иҗади конкурс җиңүчесе дип Лилия Демьянова билгеләнде. «Мисс фото» исемен Альмира Хананова яулады. Ә интернет кулланучылары исә үзләренә хуш килгән кызны компютер ярдәмендә сайлый алды. Алар үз тавышларының күпчелеген Гөлфия Халитовага бирде.

Җиңүчеләргә шактый саллы бүләкләр дә тапшырылган. Мәсәлән, «Себер йолдызы» Наилә Богаповага машина бирделәр. Бүләкләр алу, бәйгене үткәрү, оештыруга җирле эшмәкәрләр булышлык күрсәткән. Бәйгене исә Төмән өлкәсе татарлары конгрессы оештырган. «Себер йолдызы» конкурсы яшьләр арасында милләтебезгә, ана телебезгә мәхәббәт, милли горурлык хисләрен уяту максатында үткәрелә.

Фикерләр

15.01.2009 09:01 Руфилька
САМЫЕ КРАСИВЫЕ ДЕВУШКИ ЖИВУТ В НАШЕЙ ТЮМЕНСКОЙ ОБЛАСТИ

05.05.2008 11:05 Наил
Татарлар шундый бит инде алар, араларында ниндилэре генэ юк ))

05.05.2008 10:05 Мохим тугел
Кызлары япония, кытай, корея якларына тарта... татар кызларына бер дэ ошамаганнар(

04.05.2008 04:05 Былтыр
Лилия, милли купальник нигә әле тыйнаксызлык күренеше булырга тиеш? )) бәлкем ул мөселманнарның купальниклары кебек. бөтен тәнне каплый торган.. ))

04.05.2008 04:05 Лилия
Курэсен, Себер якларындагы татар кызлары милли купальникларны да тыйнак дип санамый :-)

30.04.2008 12:04 Былтыр
телевизордан бу конкурс турында бераз күрсәткәннәр иде. кызлар милли купальникларда чыкмаганнар микән? )) ансын белеп булмады. Биредә дә язмаганар ичмасам. Кызык бит.. ))

30.04.2008 12:04 Лилия
"Ләкин калганнардан аермалы буларак, монда, татар кызларының тыйнаклыгын истә тотып, сәхнәдә купальникларда йөрү юк". Игътибарлырак укырга кирэк, Былтыр ;-)

30.04.2008 11:04 Марат
Матур кызлар икэн Себердэ )))

Фикерегезне язып калдырыгыз

Исем*:
E-mail:
Текст*:
Код: Рәсемдәге текстны языгыз.